Групата е формирана 1991 година во состав: Брчиоски Ивица - соло гитара, Милошеска Ружица - вокали, Петрески Чеде - бас гитара, Брчиоски Горан - клавијатури и Милошевски Душко - тапани.
Во 1992 год. настапуваат на Поп-Рок Фест во Скопје каде што ја освојуваат првата награда и како победници го снимаат првиот албум. Албумот под наслов „Случајно тука“ го издава музичката и касетна продукција на МРТВ и истата година е прогласен за деби албум на годината. Групата настапува низ Македонија до крајот на 1994 год., после што прави подолга пауза.

Во 1999 год. повторно се враќаат на сцената со потпишување на договор со Авалон Продукција. Во меѓувреме тапанарот Душко ја напушта групата, а на негово место доаѓа Матески Драган - Гаге, а набргу на групата и' се приклучува Антески Владе како ритам гитарист. Наредната година излегува албумот „Врати на имагинација“ кој постигнува дотогаш невиден успех на македонските простори. Песната „Сите мои слики“ станува мега хит, а групата ужива популарност како никој дотогаш.
На крајот сето тоа кулминира со концерт на Скопски саем, кога поради неочекувано голем интерес голем број на обожаватели не успеваат да влезат во преполнетата сала. За нив Ареа свири уште еден концерт во Универзална сала.

Во периодот од 2000-2003 год. групата одржува преку 80 концерти во Македонија, на екс-ју просторите и Бугарија. Во 2001 год. излегува живиот албум „Да пеам... сепак можам!“ снимен на спомнатиот концерт во Универзална сала.
Наредната година (2002 год.) излегува студискиот албум „Нешто недостасува“ кој настанува во услови на воена криза во Македонија. Како резултат на тоа албумот звучи малку помрачно од претходните, но сепак Ареа не ја губи популарноста и на 23.10.2002 год. прави успешен концерт на Скопскиот саем.

Во 2005 го издаваат албумот „Теби близу“ за ПГП-РТС на српски јазик што претставува обид за пробивање на бившите југословенски простори.

Во ноември 2008 групата го издава својот шести албум насловен како „Се' што сакам си ти“ за македонскиот пазар и моментално работи на концертна промоција на истиот.